Newsflash
We have launched a special section featuring transcripts and more from radio programs for the enjoyment of fans. Thanks a lot to Sujoy Chatterjee, Ramaswamy and other contributors to the section. If you wish to provide more such content or help in posting transcripts please contact the administrator. This new section canbe accessed by clicking on Radio Se in the Specials Menu. Enjoy! You can also reach it by clicking Radio Se |
| Jaimala by Lata Mangeshkar |
 |
 |
 |
| Written by Sujoy Chatterjee |
|
The audio of this special program was originally provided by Ramaswamy and transcript prepared by me is provided here.
Aaj Ka yeh Vishesh Jaimala prastut karne jaa rahi hain Swar Samragyi Lata Mangeshkar:
Fauji bhaiyon ko Lata Mangeshkar ka namashkaar.Peechhle saalon mein maine kuch gaane gaaye hain aur kuchh gaane sune hain. Aaj jab mujhe mere pasand ke kuchh geeton ko sunwaane ke kaha gaya hai to main uljhan si mehsoos kar rahi hoon. Maine kuchh apne aur kuch doosron ke geeton ko chuna hai. Agar aapko yeh gaane pasand aaye to main samjhoongi ki mera prayaas safal raha hai. Song: Allah tero naam eeshwar tero naam Yeh bhajan maine film Hum Dono ke liye gaaya tha. Geet likha tha Sahir Ludhiyanvi ne aur sangeet tha Jaidev ka. Is bhajan ko agar subah aur raat ke waqt suna jaaye to ek ajeeb sa sukoon milta hai. Main K L Saigal sahab ki bahut badi fan hoon. Unke gaaye sugam sangeet ko sun sun kar hi mere andar gaane ki ichchha jagrit huyi. Mere pita Dinanathji bhi K L Saigal sahab ko sunte the aur akasar mujhe unke gaaye geeton ko gaane ke liye kehte the. Mujhse log poochte hain ki meri safalta ka raaz kya hai. Main yahi kahoongi ki main bhaav ko samajhti hoon aur dhun ko baar baar man mein gungunati hoon aur gaate waqt dil se gaati hoon. Ab main aapko K L Saigal sahab ka gaaya ek geet sunaati hoon. Lata hums the first 2 lines of this song. Song: Soja Rajkumari soja Agla record Manna Dey ka hai, Burman da ka sangeet jo Ahir Bhairav raag par aadhaarit hai. Shailendra ne bol likhe hain aur film hai Meri Surat Teri Aankhen. Song: Poochho na kaise maine rain beetaayi Maine kai baar dekha hai ki kadi mehnat se tayyar kiya huya geet bhi kabhi achchha nahin ban paata hai, aur kabhi jaldi jaldi mein banaya huya geet bhi bahut achchha ban jaata hai. Ek baar main Kolhapur se lautkar aayi to Naushad sahab ka Tonsils ka operation huya tha, woh kehne lage ki kal hi ek geet record karna hai, unhone usi haalat mein dhun bhi mujhe gaakar sunaya. Film Amar ka yeh geet mujhe aaj bhi bahut achchha lagta hai: Song: Jaanewale se mulaaqaat na hone paayi Woh kahavat hai na - dardeele geet zyaada meethe lagte hain, main to is baat ko maanti hoon. Ab main aapko Jahaan Ara film ka aisa hi ek meetha geet sunwaati hoon Talat Mehmood ki awaaz mein jise likha hai Rajinder Krishan ne aur dhun banayi hai Madan Mohan ne. Song: Phir wohi shaam wohi gham wohi tanhayi hai Kabhi khud pe kabhi haalaat pe rona aaya, baat nikli to har ek baat pe rona aaya. Film Hum Dono ka yeh geet Rafi sahab ki awaaz mein. Ghazal ke bol aur gaane ka andaaz dono sundar ban padaa hai. Song: Kabhi khud pe... Fauji bhaiyon ki seva mein agla geet pesh karti hoon Film Anuradha se. Shailendra ka geet, Pt Ravi Shankar ne Uttar Pradesh ke lok geet Kajri par aadhaarit iska sangeet tayyaar kiya hai. Song: Kaise din beete kaise beeti ratiya piya jaane na Waise peechhle kai varshon se hamare film sangeet par pashchimi sangeet ka prabhaav raha hai. Ab main aapko ek aisa hi geet sunwati hoon jise meri bahen Asha ne sangeetkaar O P Nayyar ke liye fil Mere Sanam mein gaaya hai Song: Yeh hai reshmi zulfon ka andhera Film Guide mein Burman da ka gaaya geet ab main aapko sunwati hoon. Aajke gaayakon mein Burmanda ki awaaz sabse alag hai, badi sahej aur saralta se gaate hain, lok sangeet ke prabhaav se unke gaane aur bhi pyaare lagte hain. Song: Wahaan kaun hai tera Is karyakram ko samaapt karne ke liye K L Saigal ke gaaye is geet se zyaada upyukt geet aur kya ho sakta hai Song: Babul mora naihar chhoot hi jaaye Achchha to mere fauji bhaiyon, mere chune huye yeh geet aapko pasand aaye honge aisa ummeed ke saath main aapse vida leti hoon... Jai Hind
Share Link: 
|
Comments
I have some old recordings.I will share it music/progm lovers.
Rgds,
V.Gandhi
RSS feed for comments to this post.